tat he ly deuoca molt la intrada he molt lo aconsellen que no hy entre e que elegisca altra penitencia, car tans daltres hy son entratz que iames no son tornatz an hy son peritz. *[b.] En ayssi lo prior los amonesta, he si veu que no los pusca moure de son preposit, ell los fa intrar en la esglesia e los fa estar per cert temps en penitencia en oracions; he a cap de temps ell aiusta totz los clercz daquella terra que si poden aiustar ny trobar, cantar vna missa bon mati en la dita esglesya; he lo home que vol intrar de dins la fossa recep lo cos de nostre Senyor Jhesu Crist he de la aygua senyhada, ayssi cum Sant Patrici ha establit e ordenat. E apres lo prior lo mena ab totz los clercs a la porta del purgatori, ab gran processio cantan las letanies; e lauores lo prior vbris la porta he ly diu los perills que hy son la hont ell vol intrar, he cum los malignes speritz ly hixiran e lo conbatran, he cum daltres en gran quantitat hy son perdutz; he si hom no vol estar per asso que no se mogua de son preposit, he lauores ell lo senyha e lo benehis, he totz aquells que aqui son, he ell se recomana a lus oracions, he los senyha, e pren comiat, he sen intra de dins la fossa. He lo prior tanqua la porta, e apres ell ab processio sen torna; e len dema mayti toman totz los clercs a la porta de la fossa, he lo prior la vbris, he si lo home es trobat aqui, ell lo menen ab gran processio a la esglesia, he sta aqui lo temps que li plau; he si no es trobat en aquella hora meteyssa que hy es intrat lo iorn dauant, [car] ells saben certament que ell es perdut en cos e en anima. E lo prior tanqua la porta e torna sen.
