mes de pahor la orrebletat de lur crit, que no auia fet lo dupte dels turmens que yo auia vistz ny hoytz ny passatz. He yo passi fora lo pont ayssi com si degu noi me deffenes. He quant yo fuy be auant e reguardi lo fluui e lo pont que yo auia passat, he los dimonis que me agueren layssat, que pus nom pogueren fer mal. Mes totas coses vi en aquell purgatori, coses les quals me foren deuedades de dir en pena de mort, ny Deu nou vulla que per ma boca sian reuelades; que pensaria los dolos ny los turmens que hy son, ell los auria tot iorn en memoria en son cor; los treballs he las penas de aquest mon, ny las altres malauties ny pobretats no lus greuaria res, car totz los turmens de aquest mon no son sino dolssas rosades de totz los mals que hi son al regart de aquells, ny nengun *[b2 ] non se delectaria carnalment en deguns delitz daquest mon. E [qui] be pensa de aquestas que son religioses e son en afflicions, deuen pensar com son grans los turmens e las penas de infern he las penas e turmens de purgatori, car prou es pus lauguera cosa suffrir las penas en aquest mon, al cos ensemps ab la anima, que quant coue suffrir e anar a tants de mals he de dolors en purgatori e pus en infern. Totes veguades preguem a nostre Senyhor que per la sua sancta misericordia he per la sua gran dolssor nos do he nos fassa passar las penas de purgatori e venir a la gloria de paradis en lo gog e en lo be que iamay nos fallira. He preguem nostre Senyhor per nostres pares e mares he per totz nostros bons amicz que son passatz daquest mon en laltre, e son en aquells turmens, que Jhesu Crist, per la sua gracia e misericordia los ne vulla gitar. He totz aquells quen preguaran ny faran almoynes ny altres bens per aquells ho per aque-
